Банкнотата од 500 евра дефинитивно оди во историјата: Еврото добива нов изглед

Процесот започна кон крајот на 2021 година и сега влегува во завршна фаза. Во избор се две теми – „Европска култура“ и „Реки и птици“. Преку нив треба да се дефинира новиот визуелен идентитет на евробанкнотите, кои во оптек би се нашле неколку години по усвојувањето на конечниот дизајн.

Темата „Европска култура“ има цел да го истакне европското културно наследство, додека темата „Реки и птици“ го нагласува симболот на слободата, единството меѓу граѓаните на Унијата и важноста на заштитата на животната средина.

Она што најмногу ги интересира граѓаните е судбината на најголемите апоени. Како што е потврдено, банкнотата од 500 евра дефинитивно нема да биде дел од новата серија.

Европската централна банка претходно го запре нејзиното производство. Иако популарната „виолетова“ банкнота нема повторно да се печати, таа и понатаму останува законско средство за плаќање.

Тоа значи дека граѓаните кои поседуваат банкноти од 500 евра не треба да паничат. Тие ќе можат и понатаму да ги користат, без временско ограничување.

Одлуката на ЕЦБ за укинување на банкнотата од 500 евра е насочена кон намалување на ризиците од перење пари и други незаконски активности, како и кон поефикасно следење на финансиските текови.

Како завршен чекор, Европската централна банка ќе започне со производство и пуштање во оптек на новите банкноти. Точниот датум сè уште не е утврден. Според информациите од институцијата, ќе бидат потребни уште неколку години пред новата серија евробанкноти да стане дел од секојдневната употреба.