Анализата на порталот Sportingpedia ги рангираше сите 48 учесници на Светското првенство 2026 според пазарната вредност на репрезентацијата по жител. Резултатите покажуваат кои земји успеваат од релативно мал број жители да создадат најголема фудбалска вредност.
Најголемото изненадување е тоа што на врвот на листата се наоѓа Курасао, најмалата држава според бројот на жители што некогаш се пласирала на Светско првенство. Со репрезентација вредна само 25,78 милиони евра и население од околу 190.000 жители, Курасао достигнува дури 135,68 евра пазарна вредност на репрезентацијата по жител.
На спротивниот крај од табелата се наоѓа Иран со само 0,34 евра по жител, што значи дека разликата помеѓу првопласираната и последнопласираната земја е речиси 400 пати.
Само пет земји над 100 евра по жител
Покрај Курасао, уште само четири репрезентации ја надминуваат границата од 100 евра по жител:
- Уругвај – 116,07 евра
- Зеленортски Острови – 108,49 евра
- Норвешка – 104,78 евра
- Хрватска – 101,49 евра
Веднаш зад нив е Португалија со 97,12 евра по жител. Особено интересно е што Португалија е единствената репрезентација чија вкупна вредност надминува една милијарда евра, а сепак се наоѓа во самиот врв на оваа листа.
Хрватска меѓу светската елита
Хрватска го зазеде петтото место и уште еднаш покажа дека е една од најуспешните фудбалски нации во однос на својата големина. Со население помало од четири милиони жители, хрватскиот фудбал со години создава играчи кои настапуваат за најголемите европски клубови.
Меѓу европските земји што се издвојуваат според овој критериум се и:
- Босна и Херцеговина – 48,75 евра по жител
- Белгија – 46,79 евра
- Холандија – 44,13 евра
- Шведска – 38 евра
- Швајцарија – 36,91 евра
Големите сили многу пониско отколку што би очекувале
Иако и понатаму ги имаат најскапите репрезентации во светот, најголемите фудбалски сили не доминираат кога во предвид ќе се земе бројот на жители.
На листата се наоѓаат:
- Шпанија – 13. место (25,50 евра)
- Англија – 16. место (24,20 евра)
- Франција – 17. место (23,24 евра)
- Аргентина – 21. место (17,38 евра)
- Германија – 24. место (11,74 евра)
Со други зборови, нивната голема популација значително го намалува резултатот кога вредноста на репрезентацијата се распределува на бројот на жители.
Бразил како најдобар пример
Бразил ја има шестата највредна репрезентација на турнирот, проценета на дури 943,2 милиони евра. Но, кога таа сума ќе се подели на повеќе од 210 милиони жители, резултатот изнесува само 4,42 евра по жител.
Тоа го сместува Бразил дури на 35. место.
Споредбата со Уругвај е особено интересна. Иако двете земји доаѓаат од Јужна Америка и имаат богата фудбалска традиција, Уругвај остварува дури 6,7 пати подобар резултат по жител од актуелниот петкратен светски шампион.
Домаќините на Мундијалот во долниот дел од табелата
Ниту домаќините на Светското првенство 2026 не можат да се пофалат со висок пласман.
Најдобро рангирана е Канада, која е на 33. место со 4,88 евра по жител. Мексико е на 41. место со 1,46 евра, додека Соединетите Американски Држави се дури на 44. место со 1,10 евра по жител, и покрај тоа што нивната репрезентација вреди 385,6 милиони евра.
Четири земји под едно евро по жител
На дното на листата се наоѓаат репрезентации чија пазарна вредност е релативно скромна во однос на бројот на жители на државата:
- Египет – 0,97 евра
- Јужна Африка – 0,75 евра
- Ирак – 0,44 евра
- Иран – 0,34 евра
Што всушност ни покажува оваа листа?
Оваа анализа покажува дека успехот во создавањето врвни фудбалери не е нужно поврзан со големината на земјата или бројот на жители. Кога пазарната вредност на репрезентациите се анализира во однос на популацијата, мали земји како Курасао, Уругвај, Хрватска или Норвешка далеку ги надминуваат традиционалните фудбалски велесили.
Додека најголемите репрезентации и понатаму доминираат според вкупната вредност на играчкиот кадар, оваа листа открива кои земји најуспешно го претвораат својот човечки потенцијал во фудбалски капитал.
Методологија: Пазарната вредност на секоја репрезентација е поделена со бројот на жители на земјата од која потекнува. На тој начин е добиена вредноста на репрезентацијата по жител, што овозможува споредба на сите 48 учесници на Светското првенство без оглед на големината на нивната популација.