Иако државата наплатува патарини и инвестира во патната инфраструктура, возачите најчесто зависат од приватни бензински станици кога им е потребен тоалет. Некаде е достапен за сите, а некаде само за муштерии.
Според експертите, јавните санитарни јазли треба да бидат составен дел од секој автопат, исто како одмориштата, сигнализацијата и патарините. Тие посочуваат дека нивното одржување може да се финансира преку приходите од патарините или преку јавно-приватни партнерства.
Во многу европски земји ваквите содржини се стандард, додека кај нас сè уште недостигаат. Затоа, велат познавачите, време е државата да обезбеди основни услови за сите патници, наместо тие да зависат од правилата на приватните објекти.