На скопскиот Кванташки пазар, ајварката се продава за околу 40 до 50 денари за килограм, додека обичните пиперки чинат од 50 до 60 денари. На ова треба да се додадат маслото, солта, другите состојки, теглите и енергијата за подготовка.
Дополнителен трошок е и работата – печењето, лупењето и подготовката на ајварот одземаат часови. Кога сопствениот труд не се пресметува, домашната варијанта може да изгледа поисплатлива, но разликата се намалува кога ќе се земат предвид сите вложувања.
Во маркетите цените на ајварот варираат, па некои производи се достапни за нешто над 200 денари за тегла, додека поскапите достигнуваат и 350 денари или повеќе.
Поинаква е ситуацијата со туршијата, корнишоните и мешаните салати. Нивната подготовка е поедноставна и не бара печење и долготрајно пржење, па домашната варијанта може да донесе поголема заштеда.
Најмногу се исплати кога зеленчукот е од сопствено производство, теглите се користат повторно, а дел од работата не создава дополнителен трошок. Ако сите состојки се купуваат, најдобро е однапред да се споредат цените со готовите производи.
Заклучокот е дека домашната зимница не е секогаш најевтина, но со добра пресметка може да биде поисплатлива – особено кај туршијата и салатите. Кај ајварот, покрај цената, важна улога има и желбата да се зачува домашниот вкус.