Зошто лесно заспиваме на кауч?
Една од причините е „притисокот на сон“ – биолошка потреба за спиење. Колку подолго сте будни, толку тој притисок е посилен. Важна улога има и циркадијалниот ритам – внатрешниот часовник кој ни кажува кога треба да бидеме будни, а кога да спиеме.
На тоа се надоврзува и околината: можеби штотуку сте завршиле оброк, удобниот кауч е во топла соба со пригушено светло и тивка програма во позадина – за многумина тоа е идеална атмосфера за дремка. Значи, кон крајот на денот притисокот на сон е силен, вашиот биолошки часовник вели дека е време за спиење, а амбиентот е пријатен и опуштен.
Што се случува по дремката на кауч?
Ако сте задремале на каучот пред да одите во кревет, притисокот на сон е помал од претходно. Наместо да имате зад себе 16 часа будност, штотуку сте се разбудиле од дремка, па потешко е повторно да заспиете во кревет. Кратка дремка од пет минути веројатно нема многу да влијае, но ако сте спиеле еден час – ситуацијата е сосема поинаква.
Тука се и циклусите на спиење, кои траат околу 90 минути. Започнуваат со лесен сон, преминуваат во длабок, а потоа повторно се враќаат во лесен. Ако се разбудите во текот на длабокиот сон, ќе се чувствувате поспани и полесно ќе продолжите да спиете во креветот. Но, ако се разбудите во лесен сон – потешко ќе заспиете повторно.
Дополнително, активностите што ги правите откако ќе станете од каучот – како палење силно светло или миење заби – можат дополнително да ве разбудат.
Зошто тешко заспиваме баш во својот кревет?
Кај многумина самиот влез во кревет предизвикува анксиозност: Ќе заспијам ли доволно брзо? Ќе се наспијам ли доволно? Таа загриженост само ја зголемува будноста. На каучот, каде што го нема тој притисок, полесно се улавува сон.
Втора причина е лошата „хигиена на спиењето“ – однесувања и навики кои не се погодни за сон. Тоа може да биде неправилна рутина пред спиење, премногу светлина и бучава во собата или користење телефон во кревет.
Добри навики се: одење во кревет во исто време, темна и мирна просторија, исклучен телефон и опуштена рутина пред спиење.
Како да си го олесните спиењето во кревет?
• Обезбедете тивка, темна и удобна соба.
• Во зимскиот период загрејте ја собата пред спиење или земете термофор во кревет; летно време користете клима или вентилатор.
• Ако ви одговара звукот од ТВ, пробајте со „бел шум“ или слични смирувачки звуци.
• Држете се до иста рутина секоја вечер и легнувајте во исто време.
• Избегнувајте користење телефон во кревет – и поради сината светлина и поради содржините што можат да ве разбудат или вознемират.