Право на К-15 имаат вработените кои во текот на календарската година работеле најмалку шест месеци непрекинато кај ист работодавач.
Тоа значи дека правото не произлегува само од фактот дека лицето е вработено во приватниот сектор, туку потребно е да биде исполнет и условот за времетраење на работниот однос.
Износот на К-15 не е ист за сите периоди од годината
Регресот за годишен одмор не претставува однапред утврдена фиксна сума. Неговата висина се пресметува врз основа на просечната месечна нето-плата по работник во државата, исплатена во последните три месеци пред месецот во кој работодавачот го исплаќа К-15.
Според правилата, минималниот регрес изнесува 40 проценти од просечната нето-плата за последните три месеци.
За 2026 година минималниот износ е околу 19.116 денари, додека работодавачот може да исплати и повисока сума доколку тоа е предвидено со условите утврдени во колективниот договор.
Последниот рок е 31 декември
Работодавачите не мора да чекаат до крајот на годината за да го исплатат регресот, но крајниот рок е 31 декември 2026 година.
За работодавачите кои нема да ја исполнат обврската за исплата се предвидени парични санкции.
Прописите предвидуваат санкции и во случаи кога К-15 формално ќе биде исплатен, но работникот потоа ќе биде принуден да му ги врати парите на работодавачот во готовина. За вакво постапување може да следува и затворска казна до една година.
Оттука, работниците кои ги исполнуваат условите треба да го добијат својот регрес најдоцна до последниот ден од годинава.