Шведскиот автор, новинар и говорник Андреас Екстром веќе години истражува како технологијата влијае врз нашите животи.
Во својата книга Тиранија на практичноста (The Tyranny of Convenience) од 2022 година, Екстром истражува каква цена плаќа општеството за технолошкиот комфор и поставува прашање дали беа во право кога одлучија да ја заменат приватноста за паметни уреди.
Екстром верува дека вештачката интелигенција ќе се прошири во речиси секој агол на нашето секојдневие, менувајќи ги нашите животи „на речиси секој замислив начин“.
За да покаже како се одвива овој процес, тој издвојува три конкретни промени кои ќе го преобликуваат нашето досегашно искуство.
Вештачката интелигенција ќе ни ја олесни рутинската работа
Прво, вештачката интелигенција би можела да ни „помогне со досадните“ задачи во различни професии, вели Екстром. Ова е она што најчесто го слушаме кога се зборува за предностите на AI.
Тоа може да вклучува пишување извештаи, пополнување договори и анализа на податоци. Автоматизацијата на таквите активности може да му ослободи време на човекот за по креативни задачи и активности кои вклучуваат човечка интеракција, а кои AI не може да ги изврши.
На пример, ако продавачот моментално е оптоварен со часови бирократски задачи секоја недела, „AI системите може да му го ослободат тоа време на тој навистина одличен продавач“, овозможувајќи му да се посвети на она во што навистина е добар – самата продажба, објаснува Екстром.
Или, на пример, вештачката интелигенција би можела да му ослободи време на хрватските лекари кои го трошат на административни задачи, пишување извештаи, водење евиденција и сè друго што денес се очекува од нив.
Вештачката интелигенција ќе им помага на луѓето да пишуваат и разбираат текстови
Екстром верува дека AI може да го промени начинот на кој луѓето комуницираат. Конкретно, тоа би можело да го промени начинот на кој тинејџерите разговараат, бидејќи, како што вели, „тинејџерите се несигурни“.
Тој предвидува дека тинејџерите во иднина при допишување можеби ќе ги „прошверцуваат“ своите пораки низ AI системите пред да ги испратат за да избегнат грешки или да не кажат нешто погрешно. Исто така, примените пораки ќе ги обработуваат преку AI за да бидат сигурни дека разбираат што другата личност всушност мисли.
Пораките ќе стануваат поизгладени и веројатно ќе покажуваат помалку личност или креативност на испраќачот. „Мислам дека личноста полека ќе се губи“, предвидува Екстром.
„Дословно, ќе имаме вештачки интелигенции кои ќе комуницираат меѓусебно во име на двајца несигурни четиринаесетгодишници“, објаснува тој.
До одреден степен ова веќе се случува, иако (сè уште) не кај повеќето млади. Според непрофитната организација Common Sense Media, 18% од тинејџерите моментално користат AI како соговорник за вежбање разговор.
Вештачката интелигенција ќе стане поспецијализирана и ќе им помага на луѓето да ги подобрат своите вештини
Со тек на време, AI би можела да стане сè повеќе специјализирана.
Наместо општи AI ботови, ќе имаме посебна AI за храна, посебна AI за „направи сам“ проекти во домот, за работилници со дрво и слично, наведува Екстром. Таа дури би можела да креира уникатни, чекор-по-чекор видео упатства за корисникот, додава тој.
Тој предвидува дека AI ќе ни помогне подобро да готвиме и да бидеме поспособни во поправка и изработка на работи во домот. Од друга страна, очекува луѓето почесто да се повредуваат при домашни работи обидувајќи се сами да ги завршат задачите, како што се поправки или поставување електрични инсталации.
Што можеме да изгубиме со технолошкиот напредок
Некои од овие технолошки поместувања можат да имаат и негативни страни, предупредува шведскиот футурист.
На пример, иако некои рутински задачи на работа можат да изгледаат како товар, тие можат да бидат искуство кое ви помага да ги изострите вештините и да станете подобри во својата работа.
Што се однесува до чатботовите кои во иднина би можеле да го обликуваат начинот на кој децата меѓусебно комуницираат, важно е децата понекогаш да кажат нешто погрешно на своите врсници, бидејќи така учат како подоцна да кажат правилна работа, објаснува Екстром.
На крајот, „оној што го добиваме во ефикасност, можеме да го изгубиме во учење и знаење“, заклучува Андреас Екстром.