Аурората настанува како резултат на зголемена соларна активност, кога наелектризирани честички од Сонцето влегуваат во интеракција со магнетното поле и атмосферата на Земјата. При судирот со гасовите во горните слоеви на атмосферата се создаваат светлосни појави во нијанси на зелена, виолетова, розова или црвена боја.
Иако поларната светлина најчесто се појавува во областите околу Арктичкиот и Антарктичкиот круг, при силни соларни бури таа може да биде видлива и значително појужно, што го прави овој настан особено редок и впечатлив за Македонија.
Според експертите, ваквите појави се поврзани со моменталниот циклус на зголемена активност на Сонцето и можно е да се повторат и во наредниот период, во зависност од интензитетот на соларните ерупции. За многумина, оваа ноќ ќе остане запаметена како редок момент кога Македонија беше осветлена од поларна светлина – феномен кој ретко се гледа од овие простори.