Според најновите податоци, во последните 11 години стапката на вработеност на младите дипломци во ЕУ е зголемена за 7,5 процентни поени.
Младите со високо образование и натаму имаат значително подобри можности за вработување. Во 2025 година, стапката на вработеност кај неодамнешните дипломци со високо образование изнесувала 87 проценти, што е речиси 10 процентни поени повеќе во споредба со лицата со средно образование, кај кои стапката достигнала 77,2 проценти.
Највисока стапка на вработеност на младите дипломци е забележана во Малта, каде што работа нашле 91 процент од неодамнешните дипломци. Следуваат Германија со 90,6 проценти и Холандија со 90,1 процент. На спротивниот крај од листата се Грција со 62,4 проценти, Италија со 71,8 проценти и Романија со 72,7 проценти.
Податоците покажуваат и родови разлики во вработеноста. На ниво на Европската Унија, стапката на вработеност кај мажите изнесувала 84,4 проценти, додека кај жените 81,5 проценти. Највисока вработеност кај мажите е регистрирана во Чешка со 92,4 проценти, пред Холандија со 92,1 процент и Германија со 92 проценти. Најниски стапки се забележани во Грција (56,8 проценти), Италија (73,3 проценти) и Романија (74,9 проценти).
Кај жените, најдобри резултати имаат Малта со 90,5 проценти, Германија со 89 проценти и Австрија со 88,8 проценти. Најниска вработеност е регистрирана во Грција (68,6 проценти), Италија (70,2 проценти) и Романија (70,3 проценти).
Во 18 земји-членки на ЕУ стапката на вработеност кај неодамнешните дипломци била повисока кај мажите отколку кај жените. Најголеми разлики се забележани во Чешка, каде што јазот изнесува 12,2 процентни поени, Латвија со 10,3 и Словенија со 6,3 процентни поени.
Во земјите каде што жените имаат повисока стапка на вработеност од мажите, најголеми разлики се регистрирани во Грција, каде што предноста на жените изнесува 11,8 процентни поени, потоа во Естонија со 5 и Финска со 4,4 процентни поени.
Извор:radiomof.mk