Имено, 20 април (4/20 според американскиот формат на датум) е неофицијален празник за сите љубители на марихуаната. Поради таа поврзаност, хотелите ширум светот се соочуваат со необичен проблем, па некои едноставно – го прескокнуваат.
Интересни решенија за необични проблеми
Бројот 420 е толку популарен меѓу љубителите на канабис што хотелските менаџери морале да најдат начини за да се заштитат од два чести проблеми – кражба на плочките со бројот на собата и користење на тие соби за пушење марихуана, пренесува index.hr.
Еден хотел, на пример, наместо бројот 420 ставил ознака „419+1“ за да ги обесхрабри и оние што сакаат да го однесат бројот како сувенир и оние што го поврзуваат со пушење. На вратите биле додадени и знаци за забрана на пушење.
Во Колорадо, каде што марихуаната е легална, еден хотел бројот 420 едноставно го насликал со шаблон директно на вратата за да избегне постојана замена на украдени ознаки. Некои хотели овој број целосно го исфрлиле, па по собата 419 веднаш следи собата 421.
Овој феномен ги надминува хотелските ходници. Поради честите кражби, сообраќајните власти во Колорадо и Ајдахо ја замениле ознаката за 420. милја на автопатот со табла на која пишува „419.99“. Во Минесота се користи ознака „42x“.
Освен бројот 420, често се избегнува и бројот 13, бидејќи се смета за несреќен. Затоа многу згради немаат 13. кат – по 12-тиот веднаш следи 14-тиот. Истото важи и за собите со овој број.
Познат е и примерот од хорор класиката „Сјаење“. Во романот на Стивен Кинг дејството се одвива во соба 217, но режисерот Стенли Кјубрик во филмската верзија бројот го смени во 237, наводно на барање на управата на хотелот „Timberline Lodge“ во Орегон, за гостите да не избегнуваат да престојуваат во вистинската соба 217. Од друга страна, хотелот „Stanley“, кој бил инспирација за книгата на Кинг, својата соба 217 ја претворил во туристичка атракција.
Потекло на шифрата 420
Иако постојат многу теории за потеклото на овој број, повеќето популарни приказни не се точни. Не се работи за полициска шифра за марихуана, број на хемиски соединенија во растението, датум на смртта на Боб Марли, ниту роденден на Адолф Хитлер. Некои го споменуваат и хитот на Боб Дилан „Rainy Day Women ♯12 & 35“, бидејќи производот од 12 и 35 дава 420.
Најприфатената верзија нè враќа во седумдесеттите години од минатиот век, во Сан Рафаел, Калифорнија. Група средношколци редовно се собирале во 16:20 кај статуата на Луј Пастер заедно да пушат марихуана. Меѓусебно го користеле изразот „Луј 420“ како шифра. Со тек на време, овој израз се проширил, а списанието High Times – своевидна библија на канабис културата – дополнително го популаризирало, претворајќи го 420 во глобално препознатлив код.