Чарлс Спенсер, помладиот брат на принцезата Дајана и вујко на принцовите Вилијам и Хари, за првпат детално ќе зборува за својата сестра во новите мемоари „Swan Song: Diana, My Sister“.
Книгата ќе биде објавена на 22 септември, а издавачот најавува дека ќе содржи „многу откритија“ кои би можеле да привлечат големо внимание од јавноста.
Спенсер, кој денес има 62 години, вели дека големиот број барања за интервјуа по повод годишнината од смртта на неговата сестра го поттикнале конечно да ги запише сопствените спомени.
Како што објаснил, сакал самиот да ги сподели своите мисли и сеќавања, наместо повторно да чита различни толкувања за животот на Дајана, за кои смета дека со текот на времето некои биле прифатени како факти, иако, според него, не се засновани на вистината.
Приказната за Дајана од перспектива на нејзиниот брат
Во книгата, Спенсер сака да ја прикаже Дајана од лична перспектива, слично како што направи и за време на нејзиниот погреб во 1997 година.
Тогаш, во емотивниот говор, тој ја опиша својата сестра како олицетворение на сочувството, должноста, стилот и убавината, но зборуваше и за нејзиниот хумор, несигурности и човечката страна. Токму таков пристап сака да го задржи и во мемоарите.
Спенсер изјавил дека сака отворено и позитивно да зборува за Дајана, но без да ја идеализира. Неговата цел е да ја претстави како вистинска личност – харизматична, енергична и полна со љубов, но истовремено и како жена која имала свои сомнежи и слабости.
Посебен дел од книгата ќе биде посветен на периодот околу нејзината смрт.
Дајана загина на 36-годишна возраст
Принцезата Дајана загина на 31 август 1997 година во сообраќајна несреќа во Париз. Таа имаше 36 години.
Во несреќата загинаа и нејзиниот партнер Доди Фајед и возачот Анри Пол. Нејзината смрт предизвика огромен бран на тага низ целиот свет, но и бројни теории и шпекулации кои со децении ја следат приказната за трагедијата.
Погребот на Дајана во Вестминстерската опатија беше еден од најгледаните телевизиски настани во тоа време. Според проценките, настанот ширум светот го следеле меѓу две и 2,5 милијарди луѓе.
Нејзиниот брат тогаш одржа говор кој остана запаметен како еден од највпечатливите моменти од погребот.
Книгата носи и поглед на нејзините последни денови
„Swan Song: Diana, My Sister“ ќе биде објавена во Велика Британија на 22 септември, а дел од книгата ќе биде посветен и на неделата што ѝ претходела на смртта на Дајана.
Издавачката куќа „Penguin Michael Joseph“ ја опишува книгата како прво обемно и отворено сведоштво на Спенсер за неговата сестра.
Покрај личните спомени, мемоарите треба да понудат и нов поглед на животот на Дајана и периодот што ѝ претходел на нејзината смрт. Издавачот најавува „многу откритија“, но истакнува дека книгата претставува и своевиден омаж на една од најпознатите жени на 20 век.
Спенсер се надева дека книгата ќе биде интересна и за генерациите кои не ја паметат Дајана од времето кога таа беше една од најпознатите личности во светот.
Неговата желба е помладите читатели преку книгата да ја запознаат Дајана не само како принцеза, туку и како личност со силна харизма, хумор и љубов, но и со свои несигурности.