Новитетот најпрво ќе биде воведен во Србија, каде што, според најавите, услугата треба да стане достапна во период пократок од 30 дена. Решението е развиено во соработка меѓу „Ракутен Вајбер“, Народната банка на Србија и компанијата „Пејчет“.
Како ќе функционира испраќањето пари?
Процесот ќе започнува во самиот Вајбер. Корисникот преку чет-бот ќе може да го избере лицето на кое сака да му испрати средства и да го внесе посакуваниот износ.
Потоа ќе биде пренасочен кон апликацијата за мобилно банкарство на својата банка, каде што ќе треба да ја потврди трансакцијата. Тоа значи дека парите нема директно да ги префрла Вајбер – трансакцијата и понатаму ќе ја извршува банката.
Компанијата „Пејчет“ во целиот процес ќе има улога на технолошка врска меѓу Вајбер и банкарската апликација.
Вајбер нема да ги чува парите и банкарските податоци
Од безбедносен аспект, сервисот нема да ги чува средствата на корисниците, ниту ќе има пристап до чувствителни податоци како ПИН-кодови, лозинки или еднократни кодови за потврда.
Финалното одобрување на плаќањето ќе се врши во банкарската апликација, како и кај останатите трансакции преку мобилно банкарство.
А што е со Македонија?
Новото решение засега е развиено за српскиот пазар, но од Вајбер посочуваат дека постои можност во иднина да биде проширено и во други земји од регионот.
Во моментов, сепак, нема официјална информација дали и кога ваквата можност би станала достапна во Македонија.
Вајбер веќе располага и со посебна услуга „Вајбер пеј“, преку која е овозможено директно испраќање пари во одредени европски земји. Македонија во моментов не е меѓу пазарите на кои оваа услуга е официјално достапна.