Одлуката за привремено одложување е донесена откако надлежните здравствени институции ги разгледале информациите што пристигнале од Хрватска.
Бидејќи станува збор за ист производител на вакцината, веднаш била контактирана Агенцијата за лекови и медицински средства – МАЛМЕД, од која се побарани детални информации за сериите на БСЖ вакцини што се користат во Македонија.
Во земјава се користи вакцина произведена од Bul Bio NCIPD од Бугарија.
Се чекаат детални информации за сериите на вакцината
Од Министерството за здравство посочуваат дека вакцинацијата е одложена додека не бидат добиени комплетни податоци за сериите, нивниот квалитет и можната поврзаност со појавата на несакани реакции.
Во Хрватска употребата на БСЖ вакцината од истиот производител беше запрена како мерка на претпазливост по пријавени сомнежи за остеитис и остеомиелитис кај неколку мали деца.
Засега, според информациите што ги пренесуваат хрватските медиуми, не е потврдено дека пријавените случаи се последица на проблем со квалитетот на вакцината, а проверките продолжуваат.
Во Македонија една пријава за сомнеж на несакана реакција во последните 10 години
Од Министерството информираат дека во изминатите десет години до МАЛМЕД била доставена само една пријава за сомнеж на несакана реакција од БСЖ вакцина.
Пријавата била евидентирана во август 2022 година и се однесувала на појава на апсцес на местото каде што била аплицирана вакцината.
Од здравствените власти нагласуваат дека ваквата реакција е наведена и во упатството за употреба на вакцината.
БСЖ вакцинацијата е задолжителна во Македонија
И покрај привременото одложување, БСЖ вакцината останува дел од задолжителната имунизација во земјава поради заштитата од туберкулоза.
Од Министерството потенцираат дека Македонија се смета за земја со висок ризик од туберкулоза, поради што имунизацијата со оваа вакцина има важно место во националниот календар за имунизација.
Кај новороденчињата БСЖ вакцината вообичаено се дава пред отпуштањето од родилиште, додека децата кои не ја примиле во тој период може да бидат вакцинирани дополнително, согласно календарот за имунизација.
Во Институтот за ТБЦ моментално има 95 пациенти
Според објавените податоци, во Институтот за ТБЦ моментално има 95 пациенти со туберкулоза, од кои 83 се случаи регистрирани годинава.
Во Детската болница Козле, пак, во текот на 2025 година биле евидентирани 15 случаи, додека годинава се регистрирани 12 нови случаи.
Здравствените власти засега не соопштуваат колку долго ќе трае привременото одложување на БСЖ вакцинацијата.
Продолжувањето на имунизацијата ќе зависи од резултатите од проверките, информациите за сериите на вакцината и проценката на надлежните здравствени институции.