„Се проценува дека следната година 75 проценти од компаниите ќе користат вештачка интелигенција (ВИ) во своето работење, моментално 50 проценти од нив се интегрирани во овој систем, но, со целата помош што ВИ ја дава во бизнисот, треба да се внимава на дезинформациите генерирани преку ВИ“, рече Адвит Пател, основач на Comms Rebel од Велика Британија.
Таа во својата презентација рече дека сме свесни дека вештачката интелигенција служи за генерирање огромна количина содржина, а во исто време ги забрзува комуникациите и ни помага да ја направиме содржината веродостојна.
„Вештачката интелигенција го обликува начинот на кој организациите ги градат своите комуникации и треба да се осигураме дека тоа нема да ни ја одземе улогата што ја имаме во комуникацијата со клиентите и компаниите. Постојат четири типа луѓе кои (не) користат вештачка интелигенција: ентузијасти - тие прават агенди, презентации, нивните патувања; неволни корисници - тие се плашат дека ќе бидат откриени како несигурни за дадена тема затоа што користат вештачка интелигенција; оние кои одбиваат да ја користат и велат дека нејзината содржина лесно се препознава; и конечно оние кои укажуваат на опасноста од вештачката интелигенција“, објасни таа.
„Неопходно е да се зголеми персонализацијата на повисоко ниво и за тоа треба да се води сметка. Вештачката интелигенција може да биде ефикасна, но не смее да биде во конфликт со етиката, во никој момент не смее да се доведува во прашање репутацијата на корисникот. Мора да бидете транспарентни со содржината генерирана од вештачката интелигенција, особено кон клиентите“, објаснува Пател.
Нема потреба да се натпреварувате со вештачката интелигенција, таа не ги познава директорите, вработените, потрошувачите, не знае кога корисникот има лош или добар ден.
Извор:faktor.mk