Додека економската неизвесност во Германија расте, а цените на горивата и енергенсите продолжуваат да притискаат врз домашниот буџет, германската влада упати повик до работодавачите да им исплатат еднократна помош од 1.000 евра на своите вработени. Сепак, голем дел од компаниите засега не се подготвени да го направат тој чекор.
Според германскиот канцелар Friedrich Merz, владата веќе презела мерки за олеснување на товарот врз граѓаните преку привремено намалување на данокот на енергија.
„Се договоривме да ги растовариме граѓаните од растечките цени на горивата. Во наредните два месеци данокот на дизелот и бензинот ќе биде намален за околу 17 центи по литар“, изјави канцеларот.
Паралелно со ова, владата ги повика работодавачите да обезбедат дополнителна финансиска поддршка за своите вработени поради зголемените трошоци за транспорт и живот, но според германските медиуми, многу компании не ја прифатиле оваа препорака.
Растот на цените се прелева во целата економија
Поскапувањето на горивата веќе влијае врз целата економија – транспортот на стоки станува поскап, а дополнителните трошоци постепено се пресметуваат во цените на производите, храната и домувањето.
Граѓаните сè повеќе внимаваат на своите трошоци и ги менуваат навиките.
„Се чувствува. Добро размислуваме каде ќе го потрошиме секое евро. Сè е поскапено и само се надеваме дека ќе биде подобро“, изјавил еден жител за локалните медиуми.
Патувањата стануваат луксуз
Германските граѓани велат дека патувањата никогаш не биле поскапи.
„Цените се вистинска катастрофа. Патувам во Полска за 80-тиот роденден на мајка ми и ова патување е поскапо од кога било“, изјавил еден угостител од Розенхајм.
Бизнис климата повторно паѓа
Според ifo Institute, деловната клима во Германија повторно бележи пад.
Експертите предупредуваат дека поради високата неизвесност компаниите ги одложуваат инвестициите, а потрошувачите трошат сè повнимателно.
Како главни причини се наведуваат:
- глобалните конфликти
- растот на цените на енергијата
- стравот од инфлација
- можен нов раст на каматните стапки
Иако германските власти уверуваат дека во моментов нема проблеми со снабдувањето со гориво, меѓународни организации предупредуваат дека кон крајот на мај и почетокот на јуни во Европа би можеле да се појават недостиг од авионско гориво.