Но, покрај строгите мерки, вниманието на посетителите го привлекува и едно поинакво лице на Турција. Таксистите во Анкара добија специјални упатства за време на самитот – задолжително да носат сиви панталони и бели кошули, а патниците да ги пречекуваат со традиционална колоњска вода и локум, симбол на турското гостопримство.
Безбедносната операција е една од најголемите во историјата на градот. За безбедноста на самитот се ангажирани околу 56.000 припадници на службите, од кои 40.000 полицајци патролираат непрекинато. Над Анкара постојано летаат борбени авиони, активирани се системи за воздушна одбрана, а на повеќе од 100 критични точки се поставени современи камери со технологија за препознавање лица. Голем број улици и булевари денеска и утре се затворени за сообраќај.
Посебно внимание привлече и реконструкцијата на воениот аеродром „Етимесгут“. Пистата беше проширена од 42 на 60 метри и продолжена на три километри за да може безбедно да го прими авионот на американскиот претседател Доналд Трамп, чија посета се смета за една од најзначајните на самитот.
Истовремено, турските власти воведоа исклучително строги ограничувања за јавни собири. Поставување шатори, делење летоци или организирање маршеви во деновите на самитот е забрането, а во пресрет на настанот беа приведени стотици лица. Дел од јавноста реагира поради тоа што дел од апсењата, според информациите, биле спроведени врз основа на разузнавачки проценки, без јавно презентирани докази.
Иако самитот ќе трае само два дена, неговото влијание врз Анкара веќе е видливо. Освен политичките разговори, годинава за првпат во официјалната програма е вклучен и Форум за одбранбена индустрија, што дополнително ја нагласува стратешката улога на Турција во рамките на Алијансата.