Според информациите, Комората испратила допис до Министерството за туризам на Грција, со предлог македонските граѓани да бидат привремено изземени од биометриската контрола при влез во земјата, во периодот од 1 јуни до 1 септември. Оваа мерка би се однесувала на новиот европски систем за влез и излез (ЕЕС), кој неодамна започна со примена.
Претседателот на Комората, Аркан Керим, изјавил дека веќе е остварен контакт со грчката министерка за туризам и дека се очекува одговор во наредните денови, со надеж дека барањето ќе биде прифатено.
Во меѓувреме, грчките власти веќе направија отстапки за одредени пазари. Така, за туристите од Обединетото Кралство е овозможено да не подлежат на биометриска проверка, со цел да се избегнат долги задржувања на граничните премини и аеродромите. Причината за ваквиот пристап е големиот број британски посетители, кои во 2025 година достигнале речиси 4,9 милиони.
Слични очекувања постојат и кај српските туристи. Директорот на Националното здружение на туристички агенции, Александар Сеничиќ, изразил уверување дека во шпицот на сезоната, особено во јули и август, грчките власти би можеле практично да го релаксираат спроведувањето на ЕЕС, дозволувајќи влез само со проверка на пасошите, како и досега.
Новиот систем за влез/излез (Entry/Exit System – ЕЕС), кој се применува на надворешните граници на Европската Унија, претставува дигитализација на граничните контроли. Наместо печати во пасошите, сега се евидентираат електронски податоци за влез и излез, времетраење на престојот, како и биометриски информации како отпечатоци од прсти и фотографија.
Иако системот има за цел поголема ефикасност и безбедност, неговото воведување веќе предизвика значителни гужви. Според извештаи на меѓународни организации и медиуми, патниците на аеродроми во повеќе европски земји, меѓу кои Франција, Германија, Италија, Шпанија и Грција, се соочиле со повеќечасовни чекања на граничните проверки.