Во првата половина од 2026 година, просечната барана цена за продажба на стан во Скопје изнесувала околу 2.156 евра за квадратен метар, според податоците на „ЦенаКвадрат“. Тоа значи дека стан од 60 квадратни метри би чинел околу 129.400 евра.
За споредба, минатата година просечната цена на станбениот квадрат во Скопје се движела околу 1.670 евра, што покажува значителен раст за краток период.
Највисоки цени се забележуваат во Општина Центар, каде што квадратен метар во новоградба на атрактивни локации достигнува близу 3.000 евра.
Растот на цените го регистрираше и Народната банка, која во последниот квартал од 2025 година забележала годишен пораст од околу 25 отсто на цените на становите во главниот град.
И покрај растот, Скопје и натаму е поевтино од повеќе балкански престолнини. Во Букурешт просечната цена на новите станови достигнува околу 2.636 евра за квадрат, во Софија се движи меѓу 2.300 и 2.600 евра, а во Сараево е околу 2.700 евра.
Во Белград цените достигнуваат над 3.000 евра за квадратен метар, додека во Загреб станбениот квадрат чини околу 4.086 евра.
Како главни причини за растот на цените се посочуваат зголемената побарувачка, недоволната понуда на нови станови и странските инвестиции.
Инаку, според Евростат, цените на станбените објекти во Европската Унија во првиот квартал од 2026 година пораснале за 5,1 отсто на годишно ниво.