„Дали Европската Унија се обидува да го контролира вашиот паричник? Поголема владина контрола врз вашите пари, помалку слобода, па дури и моментално замрзнување на сметките. Ова се гласините што кружат на социјалните медиуми со месеци за таканареченото дигитално евро. Но, дали овие гласини навистина имаат основа? Предложеното дигитално евро би било дигитална форма на готовина издадена директно од Европската централна банка и Националните централни банки на земјите-членки на Европската Унија, и би било дизајнирано да ги надополни физичките пари. Поддржувачите на дигиталното евро тврдат дека тоа сепак би им обезбедило на луѓето одредено ниво на заштита. Од друга страна, некои експерти предупредуваат дека дигиталното евро би можело да носи ризик од следење на трансакциите, додека готовината останува во голема мера анонимна“, вели Ноа Шуман.
Бруно Колмант, белгиски економист, истакнува дека постои ризик од хакирање, првенствено затоа што дигиталното евро би влегло во системот преку комерцијалните банки: „Можно е дури и без нивно знаење, тие банки да можат да се користат за следење на дигиталните трансакции со евра. Сепак, во моментов постојат заштитни мерки. Едно лице може да чува максимум 3.000 евра кај ЕЦБ. Значи, иако следењето не би вклучувало големи износи, ризикот не е нула.“
Вељко Миљушковиќ, професор на Економскиот факултет во Белград, истакнува дека земајќи го предвид бројот, количината и видот на трансакциите, идејата е тие мали, секојдневни трансакции да се третираат како готовина.
„Ова подразбира отсуство на какво било посебно следење. Сепак, можеме да кажеме дека поголемите трансакции дефинитивно ќе бидат следени со цел да се спречи криминал и перење пари. Значи, секогаш постојат стравувања кога станува збор за некаков вид иновација, но да ги погледнеме позитивните страни на ова“, вели тој.
Инаку, приватниот пазар на дигитални пари во голема мера е доминиран од американските гиганти Мастеркард и Виза, кои обработуваат повеќе од 70 проценти од плаќањата со картички во Европа. Комерцијалните банки, пак, покажуваат силен отпор кон дигиталното евро. Директорот на француската банка „Кредит Мутуел“, Даниел Бол, изјави дека дигиталното евро не одговара на ниту една потреба на граѓаните и го опиша како решение кое бара проблем.