Рестораните први ја диктираат цената. Менито по лице ретко паѓа под 30 до 40 евра, а на некои места оди и над 50. Кога ќе се помножи со 100 гости, само храната веќе прави сериозна дупка во буџетот. А тука не се вклучени пијалаци, дополнителни десерти, торта или некоја специјална маса што младенците сакаат да ја додадат „за мерак“.
Музиката е следниот удар. Бенд со солидна репутација не излегува под 1.000 евра, а често цената оди и двојно повеќе. Диџеј е поевтина варијанта, ама ретко кој сака свадба без жива музика. „Без музика нема атмосфера“, ќе ти речат сите. И тамам кога ќе помислиш дека тука завршува, следи фотограф, видео, дрон… уште неколку стотици, па и илјада евра.
Облеката? Посебна приказна. Фустаните за невеста често се изнајмуваат, но и тоа знае да чини неколку стотици евра. Ако е купен – сумата оди нагоре. Костум за младоженец, чевли, фризура, шминка, накит. Сè се собира. Малку по малку, ама на крај – голема бројка.
И не застанува тука. Покани, декорации, цвеќиња, кола за невеста, торта, ситни подароци за гостите… секоја ставка изгледа небитно додека не се стави на хартија. Тогаш станува јасно дека свадбата не е само еден ден, туку проект што се планира со месеци и троши како мал стан на кредит.
Познавачи на пазарот велат дека цените во последниве години значително пораснале. Инфлацијата не ги одминува ни свадбите. Сè што е поврзано со угостителство, услуги и забава има нова цена.
„Луѓето сакаат убав ден, ама реалноста ги стигнува“, коментираат аналитичарите.
Дел од младите почнуваат да кратат – помал број гости, пократки прослави, па дури и свадби без класичен ресторан.
Но, притисокот од околината е силен. Свадбата кај нас не е само приватен чин. Таа е и настан за семејството, за роднините, за пријателите.
„Што ќе речат другите?“ сè уште е фактор. Па така, и тие што сакаат скромно, често завршуваат со листа од 100 или 150 гости. Само за да нема навредени.
И тука доаѓа најинтересниот дел – сметката на крај. Порано се веруваше дека подароците ќе ја покријат свадбата. Денес, тоа е неизвесно. Некои ќе дадат повеќе, некои помалку. Некои ќе дојдат со подарок, не со плик. И на крај, младенците често остануваат со минус. Не огромен, ама доволен да ја расипе идејата дека свадбата е „инвестиција“.
Сепак, малкумина се откажуваат. Затоа што свадбата не се мери само во евра. Се мери во спомени, во музика што ќе остане во глава, во фотографии што ќе се гледаат со години. Во тие неколку часа кога сите се собрани на едно место.
Само што денес, за тие неколку часа, цената е јасна. Под 7.000 евра – тешко. А често и далеку повеќе.