Парична поддршка за нови лозови и овошни насади, ароматични растенија или медоносна флора

Сите земјоделски стопанства кои во периодот од 1 септември 2020 година до 31 март годинава подигнале нови повеќегодишни лозови, овошни насади или ароматични растенија и медоносна флора (еводија, багрем и фацелија ) ќе можат да аплицираат за добивање на финансиска поддршка преку мерката 121 „Инвестиции во модернизација на земјоделски стопанства". Финансиската поддршка за прифатливи трошоци по корисник изнесува 2,5 милиони денари, информира Агенцијата за поддршка во земјоделството и руралниот развој.

Агенцијата наведува дека за да може да се аплицира за добивање на оваа поддршка потребно е барателите садниците да ги имаат набавено од снабдувачи кои се запишани во регистарот на снабдувачи на семенски материјал и во регистарот на снабдувачи на саден материјал.

Средствата се обезбедени преку програмата за рурален развој, а оваа поддршка се исплаќа по принцип на ко-финансирање на завршени и исплатени инвестиции од страна на корисникот во висина од 50% од вредноста на одобрените прифатливи трошоци за инвестиции.

Крајниот рок за доставување на барањата е до 30. 09.2021 година, а детални информации поврзани со апцирањето може да се прочитаат на страницата на Агенцијата.