Холанѓаните се познати како многу пријателски настроен народ, а здравјето, безбедноста и општото задоволство се приоритетите што се следат во оваа земја. Исто така, нивната култура е опишана како исклучително либерална и отворена, а табу темите се непознати.
Ако некогаш сте ја посетиле земјата на лалињата и ветерниците, сигурно сте ја почувствувале опишаната атмосфера и сте доживеале дека нејзините жители немаат проблем да ја споделат својата приватност. Еден од показателите за горенаведеното е невообичаен - во Холандија ретко ќе видите завеси на прозорец!
Холандската архитектура и станбените згради обично се првата причина за воодушевување на посетителите. Сите згради се визуелно слични, многу тесни и високи, а доминантни материјали се тулата и дрвото. Некогаш одамна, државата ставала данок за широки градби, но Холанѓаните се снаоѓале, па за да го избегнат плаќањето на даноци, почнале да ги градат своите куќи во висина.
Така, на пример, додека шетате по каналите на Амстердам, ќе шетате и по тесни, високи, споени куќи со најмногу пет ката и три тесни прозорци по кат. И има уште една интересна работа - тешко дека воопшто ќе видите завеси на тие прозорци. Еве зошто…
Шетајќи низ улиците на холандските градови, особено навечер, ќе можете да ѕирнете во туѓите домови и да ја видите нивната внатрешност. За Холанѓаните тоа не е невообичаено, туку напротив, пожелно е.
Прифатеното објаснување на оваа појава датира уште од средниот век, од калвинизмот, гранка на протестантизмот, кој налага дека искрените граѓани немаат што да кријат, а завесите на прозорците можат да го навестат спротивното. До тоа се придржуваат Холанѓаните, кои веруваат дека слободниот поглед на нивниот дом докажува дека немаат тајни.
Несомнено, најпопуларниот мит датира од времето кога мажите поминувале многу време на море, далеку од дома и далеку од своите сопруги. Отворените завеси се погрижиле овие осамени дами да не прават ништо „погрешно“ додека нивните мажи се отсутни. Затворените завеси повикувле на сомнеж, додека отворените завеси ги „чувале“ дамите од какви било штетни озборувања.
Постои и приказна дека не ставаат завеси на прозорците затоа што сакаат да им покажат на другите колку се богати, а домот го сметаат за доследна презентација на тоа.
Трендовите во дизајнот на ентериер секако се менуваат, па денес може да сретнете и некои прозорци со завеси, но генерално ова необично правило се задржало.
