Марика Шутиновска, 69-годишна жена има 16.400 патувања со Убер и до нејзиното име има оценка со пет ѕвездички од компанијата за споделување на возење
Македонка од Окленд е еден од најдобрите возачи на Убер во светот. Марика Шутиновска, 69-годишна жена има 16.400 патувања со Убер и до нејзиното име има оценка со пет ѕвездички од компанијата за споделување на возење.
Оваа пензионерка вози 13 години, од кои осум за Убер. Иако во последниве години, Убер беше предмет на правна расправија за тоа што претставува вработен и компанијата беше критикувана за кратење на заработката на возачите, сепак, има и добри приказни поврзани со неа.
Шутиновска сака да вози како хоби за да е зафатена и надвор од дома за време на нејзиното пензионирање. Таа вози од 7 до 14 часот околу планината Еден, објавува „Stuff“.
- Толку е добро да се биде малку надвор, инаку што би правел дома? Се расправам со мојот партнер? Вака се чувствувам многу убаво, толку е добро кога на луѓето им се допаѓаш и ти даваат добра ѕвезда - рече таа.
Црвената Тојота, која ја вози Шутиновска ја нарекува нејзин „најдобар пријател“, и појаснува дека најчесто пренесува патници кои од планината Еден патуваат кон градот, или ученици во училиште.
- Ние ја работиме работата што јавниот превоз не може да ја направи - рече таа.
Нејзината тајна за добар рејтинг е чист автомобил, професионален фустан, само разговор со возачот ако сака да зборува и непречено возење.
- Не брзам никаде... само бидете трпеливи, не се расправајте со луѓето, уживајте во возењето, само бидете трпеливи и возете нормално, не треба да брзате дури и ако имате работа - дополнува Шутиновска.
Во Македонија Шутиновска била архитект, таа во Нов Зеланд се преселила во 2000 година, но не успеала да ја искористи својата диплома и да продолжи да работи во својата професија.
Шутиновска вели дека обично им дава пет ѕвезди на своите муштерии, таа дури би му дала позитивна оцена на клиент кој повраќа во нејзиниот автомобил, но да успее тоа да го направи во една од торбите за повраќање на авиокомпаниите што ги собрала од нејзините патувања во странство и ги чувала во кутијата за ракавици.
- Возев порано ноќе, па имав работа со пијани луѓе, но тие воопшто не се тешки - само треба да бидете љубезни со нив, да не ги правите нервозни и само да им дадете вреќа за повраќање за секој случај. Тие само сакаат да си одат дома, не се чувствуваат толку добро, дури и ако се пијани - вели Шутиновска.
