Австрискиот главен град го доби првиот автоматизиран воз на метрото од новата генерација. Во текот на летото ќе бидат пуштени во употреба и други возови од овој тип.
Првиот воз X беше пуштен во употреба по опсежни тестови и успешно одобрување на метро линијата U3. Има модерен внатрешен дизајн и иновативни дигитални информации за патниците, Passenger Info Plus, како и систем за навигација. На овој начин, патниците можат директно да се информираат за насоката, трансферите и времето на поаѓање на другите линии.
Има и дигитална мапа на целата мрежа на метро, на која е прикажана моменталната положба на возот, насоката на патување, следната станица, планираните ограничувања во сообраќајот или лифтовите кои се надвор од употреба. Од 2026 година, благодарение на овие возови, виенското метро ќе работи целосно автоматски на новата линија на метрото U5.
Возот на новата генерација на метро официјално беше претставен од Петер Ханке, член на градската управа за јавен превоз, претставници на градското претпријатие за јавен превоз Винер Линиен и компанијата Сименс Мобилити, носители на овој проект.
„Метрото од новата генерација ги поставува трендовите за нашата визија за еко-град. Технички напредниот воз направен во Виена, кој ги исполнува сите барања и очекувања, го прави патувањето со јавен превоз уште попривлечно и поудобно. Возовите X се дел од сеопфатна модернизација на возниот парк Винер Линиен, кој вклучува нови електрични автобуси и трамваи“, рече Ханке.
Новиот воз може да прими до 928 патници и има доволно простор за колички или багаж. Висококвалитетните седишта, вклучувајќи ги и преклопните седишта, се наредени попречно и надолжно. Седиштата означени со сина боја се наменети за патници со намалена подвижност.
Според планот на компанијата, до крајот на годината треба да бидат достапни до десет автоматски возови. Од 2024 година, Siemens Mobility ќе испорачува до три воза годишно на јавната сообраќајна компанија „Винер Линиен“, која постепено ќе ги замени постоечките возила „Сребрена стрела“.
