Првото патување со вашето бебе честопати претставува голем стрес но и тест за самите родители.Сепак тоа не треба да претставува пречка која ќе не оддалечи од идејата да отидеме на одмор кој не само што ќе ни донесе позитивна промена туку и значајно ќе го зближи целото семејство со новиот член и ќе создаде прекрасни спомени.
За да тргнете на пат со мало дете, без премногу грижи, првенствено е важно добро да се подготвите и ништо да не препуштите на случајот. Изберете проверена туристичка агенција, распрашајте се за минатогодишните искуства од роднините и пријателите со мали деца. Проверете ја достапноста на лекар и аптека во близина на вашето сместување.
Каде да патувате
Дали ќе биде вашата дестинација море, езеро или планина во многу зависи од вашите желби, локација и материјални можности. Сепак важно е да не одбирате предалечни места(и многу гранични премини) и во принцип да одите на локација до која ќе стигнете со вашиот сопствен автомобил. Така ќе имате комоција да застанувате според вашите потреби па дури и да се вратите ако работите одат во несакан правец.
Сместувањето е многу важно да е чисто и редовно одржувано, и да ги нуди сите погодности кои ги имате и дома: фрижидер, решо, садови за подготовка на храна за малиот член кој има специјални барања. Ако сте во можност сместувајте се непосредно до плажа и во приземни простории. Тоа значајно ќе го намали вашиот физички напор и нервоза бидејќи очекувајте дека често ќе се враќате назад во апартманот а притоа ќе носите многу продукти.
Бирајте мирни локации!
Трикови за безгрижно патување
Пред тргнувањето на пат однесете го возилото во сервис на темелна проверка, за да сте сигурни дека сè е во ред, проверете го маслото, гумите, количеството гориво и резервната гума.Уверете се дека седиштето за вашето дете е добро и правилно прицврстено.
Почнете со подготовките и пакувањето неколку дена порано, за да го одбегнете брзањето во заден час. Многу е корисно да направите список на работите што мора да ги земете, почнете да го пишувате неколку дена пред патувањето и на него ќе може да допишете сè за што дополнително ќе се сетите.Настојувајте што повеќе да спакувате и да сместите во просторот за багаж, за да може внатрешноста на возилото, посебно задното седиште, да остане слободно. Така на вашето бебе или дете ќе му биде многу поудобно во неговото седиште.
Планирајте долгото патување со возило да го почнете по добар ноќен одмор и по квалитетен појадок. Добро прегледајте ја рутата и планирајте застанување на соодветно место на секои два - три часа како би ја проверите состојба на пелените на бебето и би го нахраниле. Ако детето е поголемо патувањето може да му биде здодевно.Затоа повремено застанете за детето да се истрча, прошетајте со него, разгледајте ја околината.
Применувајте ја рутината што и инаку ја имате дома. Ако го планирате ручекот во вообичаеното време, може да очекувате дека и вашето дете ќе поспие по ручекот, како и обично. Обезбедете си доволни количини вода/млеко кои соодветно ќе ги складирате.
Не патувајте во најтоплиот дел од денот и внимавајте на употребата на клима уредот кој е штетен и за Вас и за детето. Ако веќе мора да се користи насочете го кон прозорците или кон нозете.
Во ниедна околност не го оставајте вашето бебе само, заклучено во автомобилот!
Што треба да носите за бебето во вашето возило?
·Пелени: земете доволно пелени во случај на вонредна потреба или продолжено патување – на бебињата често им се потребни дури и до десетина пелени дневно.
·Простирка за преповивање и влажни марамчиња за бришење на бебето при преповивање.Корисно е да имате и бебешка крема во туба..
·Термос со превриена вода и шишенца за хранење како и повеќе цуцли. Ако бебето е на вештачка храна или детето е поголемо, однапред одмерете го потребното количество храна во прав во секое шишенце и во термосот земете превриена вода, за да може да го приготвите потребниот број оброци во текот на патувањето. Ако детето е поголемо, земете за него нешто да грицка. Наместо чипс и кекс, земете свежо овошје, парчиња тврдо сирење, суво овошје, крекери и сл.
·Играчки, книги, таблети, музика: земете ја најдрагата плишена играчка или други играчки со кои детето сака да си игра. Земете и некоја сликовница, како и неколку цедиња со песнички за деца. Ако детето е поголемо наполнете го вашиот таблет со цртани филмови кои детето ги сака. Така ќе си обезбедите подолг период без плачки во автомобилот.
Сонце, вода, плажа, инсекти...
Погрижете се вашето бебе да биде добро заштитено од сонцето додека е на отворено. Главчето на детето заштитете го со платнена шапка, најдобро со таква што има штитници за задната страна на вратот и за ушите. Важно е шапката да ги засенува челото, носот, вратот и ушите зашто се најизложени на сонцето, па на тие места често се јавуваат изгореници од сонце.Нежната кожа на детското лице заштитете ја со крем или со лосион со висок заштитен фактор , а за заштита на очитекористете очила за сонце кои штитат од ултравиолетови зраци.
Заштитете го и телото. Внимавајте облеката добро да го штити вашето дете и да не е премногу тесна. Поширока облека му овозможува на детето да се разлади.Ако рацете и нозете на детето се сепак изложени на сонце, намачкајте ги обилно со заштитен крем а стапалата заштитете ги со памучни чорапчиња и сандали.
Откако ќе заврши денот поминат на плажа, секогаш користете средство наменето за по сончање.
Комарците, осите и медузите, честопати се неизбежен „сопатник“ на одморот и важно е да имаме прва помош во случај на проблеми со нив.
Летото е синоним за игра и постојано движење, а тоа на отворен простор знае да донесе и повреди (исеченици, исчашени зглобови). Затоа, не заборавајте ги средствата за дезинфекција, завоите, газите, водоотпорните фластери, антибиотски прашок или спреј.
Летна Патна аптека за деца - што треба да содржи:
1) Прва помош за проблеми при патувања
·средство за смирување на стомачни тегоби и мачнина од патување (пробиотици).
·средство против пролив/запек, повраќање (пробиотици + ОРС).
·лекови за намалување на зголемена телесна температура (антипиретици).
·дигитален термометар, кој е практичен зашто не може да се скрши.
·физиолошки раствор и капки - корисни се за ублажување на симптомите на настинка и течење на носот
2) Прва помош за проблеми со изложеноста на сонце
·крема за заштита од сонце и крема за после сончање
·средства против алергии
·крема против изгореници од сонце
3) Прва помош за проблеми со инсекти и др.:
·средство против инсекти (комарци)
·крема за ублажување на болка од убоди од инсекти или медузи
·Пинцета: без неа не ќе може да извадите трн, боцка од еж и слични работи забодени во кожата
4) Прва помош при повреди
·средство против болки (аналгетици)
·средство за дезинфекција на рани (алкохол, јод)
·фластери
·завој
·ханзапласт
·стерилни гази
