Работниците на истокот на Германија сè уште се помалку платени отколку на запад, повеќе од 30 години по повторното обединување, според студија на економскиот институт ifo.
Во 2022 година работниците во поранешна Сојузна Република Германија заработувале во просек по 31,40 евра на час, а оние во поранешната Германска Демократска Република 26,60 евра.
Изворот на две третини од јазот во платите лежи во структурните економски разлики, тврди ifo. Кога ќе се земат предвид структурните разлики, јазот во платите се намалува од 15 на пет проценти, истакнува економистот на ifo, Јоаким Рагниц.
„Многу луѓе на истокот работат во сектори со ниски плати, големите индустриски компании кои плаќаат добри плати се едвај застапени во тој дел (од Германија)“, рече економистот Јаник Науерт од филијалата на ifo во Дрезден.
Бројките сугерираат дека предлогот на владата во Берлин да покрие повеќе работници во поранешна Источна Германија со колективни договори нема значително да го намали јазот, рече Рагниц, истакнувајќи дека договорите не вклучуваат многу помали компании. Останува да се види дали бумот на инвестициите на големите мултинационални компании, како што се Tesla и Intel, во фабриките во поранешна Источна Германија ќе ја намали разликата, додава тој.
Извор: kajgana.com
