На 15 октомври официјално започна грејната сезона и оттогаш радијаторите во повеќето домаќинства кои користат централно парно се топли.
Но, не се сите задоволни од затоплувањето, бидејќи некои радијаторите не греат доволно, а некои радијатори воопшто не греат, па станарите упорно чекаат да се реши дефектот во нивната зграда.
Во меѓувреме, тие се приморани да користат „дополнително греење“, обично на струја.
Различни грејни тела различно трошат електрична енергија. Во секој случај, дополнителното греење ќе ви ја покачи сметката за најмалку 3.000 денари во текот на целата грејна сезона, која официјално трае 180 дена.
Што се однесува до дополнителното греење, Денар се распрашуваше дали греалките, електричните радијатори или клима-уредите се најисплатливи за користење.
Електричарите со коишто разговаравме велат дека обично становите и куќите се греат по два часа дневно со дополнително греење, покрај стандардното греење, а потрошувачката на енергија зависи од киловатите на грејното тело.
Да земеме електрична греалка која троши два киловат-часови. Доколку ваквото дополнително греење би се користело два часа дневно во текот на сите 180 дена, тоа би чинело меѓу 3.000 и 5.000 денари, за целата грејна сезона.
Што се однесува до климата, доколку се користи само за два часа дневно за загревање, тоа задоволство ќе чини околу 2.500 денари за цела сезона.
Термо-печка или клима уред за греење?
Термо-печката сѐ уште се смета за исклучително скап тип на греење, па затоа треба внимателно да се користи.
Секако, најдобро е печката да се полни, односно греачите да работат само ноќе, кога струјата е поевтина, а преку ден да испушта само топол воздух.
При изборот на термо-печка важно е таа да не е премала за просторот што треба да го загрева, бидејќи тогаш за да ја достигне саканата температура ќе мора често да дува топол воздух што ќе доведе до брзо трошење на акумулираната топлина, па неопходно ќе биде ново полнење во текот на денот кога струјата е многу поскапа.
За да може термо-печката секогаш да работи само кога струјата е поевтина, препорачливо е да се набават тајмери кои овозможуваат автоматско вклучување. На тој начин, потрошувачите не мора да останат будни до 22 часот, 23 часот или до полноќ, во зависност од тоа каде живеат, за да ја вклучат печката. Патем, овој тип на печка троши од 1,5 до 3 киловат-часови.
Иако сигурно не се мнозинство, но има граѓани кои цела сезона се греат само со помош на клима уреди кои работат и до 10 часа дневно.
Просечниот клима уред, инаку, троши околу 2 киловат-часови електрична енергија, што е 20 киловат-часови дневно. Секако, потрошувачката на клима уредот зависи од повеќе фактори – дали е поставен да грее или само да одржува просечна собна температура, колкава е просторијата што се загрева, како и каква е изолацијата на објектот, но и колку е студено времето надвор.
Значи, ако клима уредот работи 10 часа дневно, грејната сезона ќе чини околу 24.000 денари, односно околу 4.000 денари месечно.
