Вработените во јавната администрација на Австралија конечно добија согласност дека можат да работат од дома за време на пандемијата на коронавирусот.
Федералната влада на Австралија во неделата издаде нови упатства до федералните оддели и агенции да им овозможат на што поголем број вработени да работат од дома бидејќи пандемијата “Ковид-19” продолжува да се шири, пренесува Гардијан.
Јавниот сектор на Австралија брои околу 160.000 вработени, а опцијата за работа од дома за нив доаѓа по острите реакции на синдикатите кои ја обвинија владата за хипокризија бидејќи постојано им укажува на компаниите од приватниот сектор да им дозволат на вработените да работат од дома, а ништо не презема за тие што работат под нејзина капа.
До вчера, во земјата немаше јасна политика за тоа како треба да постапат вработените во државниот сектор па тоа предизвика збунетост во голем број синдикати кои опфаќаат и јавни службеници.
Во неделата, комесарот за јавни услуги Питер Волкот објави нова документ со која стана јасно дека препораката за работа од дома се однесува и за јавните службеници нагласувајќи дека не може едни правила да важат за вработените во приватниот сектор, а други за тие во јавниот сектор.
Тој појасни дека финалниот збор го имаат раководителите на институциите и агенциите, но треба да биде јасно дека работењето од дома, таму каде што е возможно, во моментов е приоритет.
Некои институции како Министерството за финансии веќе имаат голем дел од луѓе кои работат од дома, но во другите институции се’ уште беше задолжително да се доаѓа на работа.
