Ел Нињо е особено силен во тропскиот Пацифик, каде што температурата на водата на одредени места е повеќе од 2,5 степени над повеќегодишниот просек. Сепак, неговото влијание врз Европа е главно индиректно. Историјата покажува дека силен Ел Нињо не значи автоматски студена европска зима. Во текот на најсилниот досега забележан супер Ел Нињо, во 1997/1998 година, Германија, на пример, имаше една од најблагите зими.
Во моментов се разгледуваат три можни сценарија. Првото предвидува блага и дождлива зима, со можни бури и силни ветрови, како и зголемен ризик од поплави. Второто е променлива и релативно блага зима, каква што во последните години е сè почеста, со малку снег во пониските предели. Третото сценарио е поврзано со слабеење и нестабилност на поларниот вртлог, што би можело да овозможи студениот арктички воздух да се спушти далеку кон југ, особено во втората половина од зимата.
Засега, континуирано студена и снежна зима се смета за најмалку веројатното сценарио. Поголеми се шансите за поблага, дождлива и ветровита зима, но конечната слика сè уште не може со сигурност да се предвиди.
Дополнителен фактор е позитивниот дипол на Индискиот Океан, кој истовремено се засилува. Според сезонските прогнози, комбинацијата од силно Ел Нињо и оваа океанска аномалија би можела значително да влијае врз временските обрасци на северната хемисфера во текот на зимата 2026/2027 година.
За Европа прогнозите засега укажуваат на потопла и поврнежлива зима од просекот, под влијание на посилниот западен воздушен тек од Атлантикот. Повисок воздушен притисок се очекува над јужна Европа и Медитеранот, додека понизок би доминирал над северните и северозападните делови на континентот.
Снегот најверојатно ќе биде почест во северните и североисточните региони и во повисоките планински предели на централна Европа. Сепак, поединечни студени продори би можеле да донесат снежни епизоди и во внатрешноста на континентот.
Комбинацијата од супер Ел Нињо и позитивниот дипол на Индискиот Океан ќе има значајно влијание врз млазните струи. Додека Северна Америка би можела да има поактивна снежна сезона во централните и јужните области, за Европа моменталните прогнози повеќе укажуваат на блага, дождлива зима со силно атлантско влијание.
Затоа, дали навистина нè очекува „зима на векот“ сè уште е отворено прашање. Во следните недели клучен ќе биде развојот на поларниот вртлог, кој би можел значително да ја промени зимската слика во Европа.