Според информациите од РКЕ, грејната сезона 2026/2027 ќе трае од 15 октомври до 15 април.
Сепак, почетокот и крајот не се целосно фиксни. Доколку временските услови го наложуваат тоа, испораката на топлинска енергија може да започне порано, односно од 1 октомври, а сезоната може да биде продолжена најдоцна до 30 април.
Кога може греењето да биде пуштено пред 15 октомври?
Клучен фактор е надворешната температура. Предвремен почеток на греењето е можен кога прогнозираната средна надворешна температура за следниот ден е еднаква или пониска од 12 Целзиусови степени.
Тоа значи дека доколку во првата половина од октомври пристигне позначително заладување, граѓаните приклучени на системот за топлинска енергија не мора нужно да го чекаат 15 октомври.
Во домовите треба да се обезбедат 20+1 степени
Во текот на грејната сезона снабдувачот има обврска во грејните простории да обезбеди температура од 20+1 Целзиусов степен, во периодот од 6:00 до 22:00 часот.
Пред почетокот на сезоната, РКЕ апелира до заедниците на станари да ги проверат внатрешните инсталации, како и инсталациите во станбените објекти.
Потребно е навреме да бидат подмирени и сметките за електрична енергија што се однесуваат на топлинските потстаници, со цел да нема пречки при стартувањето на греењето.
Така, иако 15 октомври останува официјалниот датум за почеток на грејната сезона, временските услови ќе одлучат дали радијаторите во дел од домовите ќе се затоплат и порано.