Предлогот предвидува работодавачите редовно да ги проценуваат ризиците поврзани со стресот и прекумерното работно оптоварување и, доколку е потребно, да преземаат конкретни мерки за нивно намалување.
Посебно внимание се посветува и на работата од далечина, вештачката интелигенција и автоматизираниот надзор. Пред воведување вакви системи би требало да се проценува нивното влијание врз работниците и да се обезбеди човечки надзор.
Меѓу предложените мерки е и „правото на исклучување“, односно работниците да не бидат обврзани да бидат достапни за работа надвор од работното време.
Новите правила би опфатиле и мерки против насилство, мобинг и дискриминација, како и поддржан и постепен повраток на работа за лицата кои отсуствувале поради психосоцијални ризици.
Иницијативата засега не е закон. Комисијата за вработување и социјални прашања на Европскиот парламент ја усвои со 41 глас „за“, 12 „против“ и четири воздржани, а за неа треба да се гласа и на пленарна седница во октомври.
Доколку биде усвоена, Европската комисија ќе треба да одговори на барањето и да ги наведе следните чекори за евентуално воведување ново законодавство.