Во текот на јули биле регистрирани вкупно 223.711 туристи, кои оствариле 795.083 ноќевања.
Од вкупниот број посетители, 57 проценти биле странски туристи, додека 43 проценти биле домашни гости.
Иако странските туристи биле побројни според бројот на посетители, домашните гости имале значително поголемо учество во вкупниот број ноќевања. На нив отпаѓаат 67,2 проценти од сите ноќевања, додека странските туристи учествувале со 32,8 проценти.
Турција убедливо на првото место
Кога станува збор за странските туристи, Турција и во јули била убедливо најголемиот пазар за македонскиот туризам.
Во земјава пристигнале 50.955 туристи од Турција, бројка која е значително повисока во споредба со останатите земји.
На второто место е Србија со 13.074 туристи, а потоа следуваат Германија со 5.393 и Романија со 5.090 туристи.
Благ раст на туризмот од почетокот на годината
Позитивно движење се забележува и кога ќе се анализираат првите седум месеци од 2026 година.
Во периодот јануари – јули 2026 година, вкупниот број туристи во Македонија е зголемен за 1,5 проценти во споредба со истиот период минатата година.
Кај домашните туристи е забележан раст од 1,8 проценти, додека бројот на странските гости е зголемен за 1,3 проценти.
Истовремено, вкупниот број ноќевања во првите седум месеци од годинава е зголемен за 0,5 проценти на годишно ниво.
Кај домашните туристи бројот на ноќевања е намален за 1 процент, додека кај странските гости е регистриран раст од 2 проценти.